Ѕвезденото небо над светот во февруари
 

Заради тоа што се се движи и се се менува, на небото во февруари не очекуваат неколку позначајни промени. Имено, Венера на 11-ти февруари 2018 година, ќе помине од знакот Водолија во Риби. Додека Сонцето и Меркур ќе и се придружат на 19-ти февруари и целото ова ѕвездено јато ќе го пресретне Нептун во последната декада на февруари. А, за доживувањето да биде поефектно, сето тоа ќе биде зачинето и со Соларната Еклипса (затемнување на Сонцето) на 15-ти февруари. Целиот сплет на промени би требало да предизвика втората половина од месецот да помине во знакот на најважните празници во февруари, Свети Трифун и Свети Валентин. Значи, да помине во знакот на виното, романтиката, љубовта, фантазијата, креативноста, пијанството и нерационалните постапки.

Но, да тргнеме со ред.

Како што веќе напоменав, до 11-ти февруари 2018 година, Венера ќе престојува во непредвидливата Водолија. Тоа ќе ги направи нејзините вибрации поексцентрични и ќе ја иницира кај луѓето потребата од дружење, слобода, експериментирање во љубовта и сексот. Нејзините вибрации би требало да го разбудат љубовниот живот кај воздушните и огнените знаци. Па, ако сте родени во знакот Близнаци, Вага, Водолија, Овен, Лав и Стрелец, постои можност да го подобрите својот љубовен живот во првата декада на февруари. Тоа значи, дека, ако сте сами, би требало да се зголемат шансите за интересни сексуални контакти кои не обврзуваат. Ако сте во врска, ќе почувствувате релаксирање на односите со партнерот. Но, и копнеж по авантура и пробување од забранетото овошје.

До 19-ти февруари 2018 година, Меркур, планетата на комуникациите, трговијата и патувањата, исто така ќе престојува во оригиналната Водолија и неговите вибрации ќе го поттикнуваат вашиот ум повеќе да размислува за иднината. Па, вие ќе имате поголема потреба да полемизирате со другите луѓе на теми кои задираат во квалитетот на животот на вашата заедница. Посебно ако сте родени во знак или со подзнак во Водолија. Исто така, би требало да покажувате поголем интерес за покажување хуманост кон другите луѓе, кон сиромашните и обесправените, кон животните. Можеби ќе имате зголемена потреба да се здружувате со ваши истомисленици во остварувањето на идеи и цели, од кои корист би имала пошироката заедница. А, посебно маргинализираните групи и социјалните случаи.

Од 11-ти февруари до 7-ми март 2018 година, Венера ќе го продолжи својот пат низ сензитивните Риби. Меркур и Сонцето ќе и се придружат на 19-ти февруари. А, во периодот од 21-ви до 26-ти февруари ова ѕвездено јато ќе го пресретне магот на илузиите, Нептун, владетелот на креативните и нереални Риби. Па, заради тоа што кога се наоѓаат во Риби вибрациите на Венера се егзалтирани, тие, под влијанието на сплетот вибрации од Меркур, Сонцето и Нептун, кои исто така ќе бидат сконцентрирани во знакот Риби , ќе предизвикаат да ве преплават длабоки чувства, да се почувствувате поврзани со целиот свет. Ќе се зголеми вашата интуиција, бујната фантазија, гладот за духовна храна. Ќе станете поподложни на туѓите сугестии и на влијанието од околината. Но, би требало да станете и почувствителни и поемпатични отколку обично, подготвени да се жртвувате во име на љубовта.

Овие тенденции во вашето однесување ќе бидат посебно забележливи во периодот од 21-ви до 28-ми февруари, кога Венера ќе ги здружи своите сили со Меркур и Нептун. А, уште повеќе ако сте родени во периодот од 3-ти до 9-ти март. Во целата оваа игра на чувства, фантазија, некритичност, нерационалност и креативен набој, најдобро ќе си поминат оние од вас кои се занимаваат со уметност, оние кои произведуваат алкохолни пијалаци, лекарите, фармацевтите, оние чија што професија е поврзана со човековата душа и тазе вљубените.

Останатите би можеле да станат конфузни, оптоварени со спомените од минатото, песимистички расположени, интелектуално инертни, невротични, склони на неверство, премногу нереални во своите врски, со без'рбетно однесување, слаби на алкохолот и другите опојни средства. Посебно кога Венера, Меркур и Нептун ќе ги вкрстат своите вибрации со оние на агресивниот Марс од Стрелец, во периодот од 18-ти до 28-ми февруари 2018 година. Непријатните манифестации на оваа планетарна борба најсилно ќе ги почувствуваат родените во периодот од 9-ти до 19-ти март. Потоа, родените од 9-ти до 20-ти јуни, родените од 11-ти до 22-ри септември и оние кои се родени во периодот меѓу 11-ти и 20-ти декември.

Инаку, во текот на целиот месец, Марс, планетата на акцијата и агресијата, ќе маршира низ идеалистички расположениот Стрелец. Тоа ќе ја зголеми нестрпливоста меѓу луѓето, отпорот кон подредената положба и желбата да се поправат сите светски неправди. Посебно енергични ќе се почувствуваат Стрелците родени во периодот меѓу 25-ти ноември и 11-ти декември. Па, тие би можеле да ги остварат своите амбиции, ако правилно ја насочат својата енергија. А, правилно ќе значи, ако се ангажираат во решавањето на проблемите поврзани со правото и правдата, во спортските активности, во ловот, во патувањата, во дипломатијата, во работата со странство и високото образование, во религијата.

Во спротивно, ненасочената енергија би можела да ве направи арогантни, нетолерантни, саркастични, посебно кон послабите од вас. Но, би можела да ве направи и склони кон авантура и коцка, фанатични, подготвени да газите по трупови за да ја остварите својата цел. Посебно во периодот од 18-ти до 28-ми февруари. А, уште повеќе ако сте родени во периодот од 9-ти до 19-ти март, од 9-ти до 20-ти јуни, од 11-ти до 22-ри септември и од 11-ти до 20-ти декември.

Што ќе се случува во државата во февруари

Што се однесува до случувањата во државата, би требало да се засили активноста на дипломатските и црковни служби. Да зачестат патувањата на високи државни и црковни делегации во странство, да се интензивираат преговорите со странци. Ќе бидат пласирани многу дезинформации и лаги по медиумите. Сите ќе трагаат по вистината, но, поради преголемата какофонија, нема да знаат во кој правец да ја бараат. Препорачливо е да не се потпишуваат какви било позначајни договори во периодот меѓу 21-ви и 26-ти февруари, бидејќи тие би можеле да бидат нејасни, завиткани во обланда или да претставуваат некаква измама. „Однадвор мазно, а внатре празно“, што би рекол нашиот народ. Затоа пак, полн погодок ќе бидат сите договори потпишани на 27-ми и 28-ми февруари. Бидејќи, врз нив својата рака ќе ја положи Јупитер, планетата на среќата.

Какво ќе биде влијанието на останатите планети врз животот на обичните луѓе

Што се однесува до животите на нас, обичните луѓе, како што веќе знаете, Јупитер и понатаму ќе ги шири своите оптимистички вибрации во Шкорпија, до ноември 2018 година. Но, неговото поттикнувачко и позитивно влијание во февруари 2018 најмногу ќе го почувствуваат Шкорпиите родени на 13-ти, 14-ти и 15-ти ноември. Истовремено тие ќе мора да внимаваат колку и што јадат, со цел да не се здебелат нагло. А потоа, Јупитер ќе ги благослови и родените на 14-ти, 15-ти и 16-ти јули и на 12-ти, 13-ти и 14-ти март. Родените на горенаведените денови, во периодот од 25-ти до 28-ми јануари, кога Јупитер ќе праќа поттикнувачки вибрации кон Меркур, Венера и Нептун во Риби, би можеле до уши да се вљубат и да ги изреализираат своите професионални планови на неочекуван и креативен начин.

Сатурн, мудриот и непоткуплив учител, ќе не искушува сите нас до крајот на март 2020 година. Но, во февруари 2018, неговите награди и казни најмногу ќе ги чувствуваат родените од 26-ти, 27-ми, 28-ми и 29-ти декември. Потоа, родените на 23-ти, 24-ти, 25-ти и 26-ти март. Родените на 26-ти, 27-ми, 28-ми и 29-ти јуни. Како и родените на 28-ми, 29-ти, 30-ти септември и 1-ви октомври. Казните ќе ги почувствуваат оние кои се мрзеливи, оние кои се огрешиле од законот, оние кои немаат изградено правилен став кон авторитетите, оние кои се занимаваат со политика и оние кои водат нездрав живот или се оддадени на пороци.

Под влијанието на непредвидливиот Уран, родените на 15-ти и 16-ти април ги очекуваат непланирани промени во животот. Нептун на родените на 4-ти март ќе им подари харизматичност, креативност, но и конфузни мисли. Додека Плутон на родените на 10-ти и 11-ти јануари ќе им го дрма тлото под нозете, со цел да ги натера да го сменат досегашниот начин на живот и да скокнат скалило погоре на еволутивен план.

И како јаготка врз шлагот на сите овие промени на планетарните констелации ќе се случи и Соларната Еклипса (затемнување на Сонцето) на 27 степени и 08 минути од Водолија, на 15-ти февруари 2018 година. Подетално за еклипсата ќе пишувам во следниот текст. Сега само ќе напоменам дека нејзиното влијание најмногу ќе го почувствуваат фиксните знаци. Посебно родените на 16-ти февруари, 18-ти мај, 20-ти август и 19-ти ноември.

Бесплатниот примерок на вашата Натална Карта можете да го направите на оваа страна

Споредбениот Хороскоп на оваа страна

Додека повеќе содржини со астролошка тематика ќе можете да најдете на оваа страна

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.